ÍSAT

Norræna skólahlaupið fór fram í Síðuskóla í dag, fimmtudaginn 30. september, með miklum glæsibrag. Nemendur og starfsfólk fóru samtals meira en 900 kílómetra og margir nemendur sýndu frábæra tilburði og kennarar og starfsfólk tóku einnig vel á því. Nemendum var skipt í 3 hópa og voru veitt verðlaun fyrir þrjá fyrstu strákana og þrjár fyrstu stelpurnar í hverjum hópi. Í 8.-10. bekk voru þessir fyrstir:  Kolbeinn Höður Gunnarsson 10. be.  Anton Freyr Jónsson 10. be.  Emil Þór Arnarson 8. be.    Erla Sigríður Sigurðardóttir 8. be.  Helena Rut Pétursdóttir 9. be.  Eva Kristín Evertsdóttir 9. be. Í 5.-7. bekk voru þessir fyrstir:  Haukur Brynjarsson 5. be.  Sævar Þór Fylkisson 5. be.  Hafþór Már Vignisson 6. be.  Melkorka Ýr Ólafsdóttir 7. be.  Karen Sif Jónsdóttir 7. be.  Hulda Björg 5. be. Í 1.-4. bekk voru þessir fyrstir:  Sindri Már Sigurðsson 4. be.  Elmar Þór Jónsson 3. be.  Karl Raguel Alexandersson 4. be.  Hulda Karen Ingvarsdóttir 4. be.  Inga Rakel Pálsdóttir 4. be.  Fanney Rún Stefánsdóttir 4. be. Í heildina tókst hlaupið mjög vel og verða birtar myndir frá hlaupinu hér mjög fljótlega.

Föstudaginn 1. október er skipulagsdagur í skólanum og engin kennsla. Frístund er opin eftir hádegi. Starfsfólk skólans mun þennan dag taka þátt í ráðstefnunni Samstarf og samræða allra skólastiga sem haldin er hér á Akureyri. Fjallað verður um nýjar aðalnámskrár og grunnþætti menntunar. Ólafur B. Thoroddsen Skólastjóri Síðuskóla

Þann 30. september klukkan 17:00 til 18:00 verður fræðslufundur um SMT – skólafærni fyrir foreldra barna í 1. bekk og aðra foreldra sem vilja rifja upp eða hafa ekki farið á slíka fræðslufundi. Fundurinn verður haldinn á sal Síðuskóla og við vonum að sem flestir sjái sér fært að mæta.

Valgreinin útivist, hreyfing og skyndihjálp er að hefja sinn þriðja starfsvetur. Í vetur eru 22 nemendur sem koma úr öllum grunnskólum Akureyrar.  Aðalmarkmið valgreinarinnar er að stunda útivist s.s. fjallgöngur, hjólaferðir, skíði og fl.  og einnig að læra skyndihjálp. Fyrsta gönguferðin var farin 8. september og var gengið upp í Fálkafell sem er gamall skátaskáli fyrir ofan bæinn. Þaðan var gengið yfir í Gamla sem er skáli fyrir dróttskáta á Akureyri. Síðan gengum við í gegnum Naustaborgir og heim. Fengum mjög gott veður og mikið var um berjatínslu á leiðinni. Frábær ferð í alla staði og stóðu krakkarnir sig mjög vel. Umsjónaraðili með útivistarvalinu er Anna Sigrún Rafnsdóttir kennari í Síðuskóla. Myndir úr ferðinni má skoða hér.

Á föstudaginn 10. sept. var opið hús í öllum grunnskólum á Akureryri í tengslum við námsstefnu um Byrjendalæsi sem haldin var á vegum skólaþróunar við Háskólann á Akureyri.  Í Síðuskóla komu í heimsókn nær 40 kennarar frá Rimaskóla, Hvaleyrarskóla, Laugarnesskóla, Klébergsskóla, Hafralækjarskóla og Breiðagerðisskóla til að kynna sér starf skólans. Á námsstefnunni í HA sem ætluð var kennurum sem tekið hafa þátt í þróunarstarfinu í Byrjendalæsi, voru fjórir kennarar skólans með málstofu. Margrét Baldvinsdóttir og Sara E. Svanlaugsdóttir, kennarar í 3. bekk, höfðu málstofu um skipulag náms og kennslu í Byrjendalæsi og Laufey Svavarsdóttir og Sigrún Ásmundsdóttir, kennarar í 2. bekk, voru með málstofu þar sem þær fjölluðu um ritun, frá texta að ritun. Sigrún var einnig með málstofu þar sem hún kynnti meistaraverkefni sitt "Læsisnámið þarf að vera skemmtilegt".  Kynningum kennaranna úr Síðuskóla var mjög vel tekið og lífleg umræða í þeirra málstofum. Það er greinilegt að starfið sem unnið er í Byrjendalæsi í Síðuskóla er farið að vekja athygli og það víðar en hjá nemendum og foreldrum þeirra.  

Leitin að grenndargralinu hefst mánudaginn 6. september. Þetta er í þriðja skipti sem nemendur í 8.-10. bekk hefja leit að hinu eftirsóknaverða grali. Hugmyndin að verkefninu fæddist í Giljaskóla sumarið 2008 og um haustið hófu nemendur skólans leit að grenndargralinu í fyrsta skipti. Árið 2009 tók Síðuskóli þátt og nú hefur Glerárskóli bæst í hópinn. Bjóðum við nemendur Glerárskóla velkomna til leiks. Þrautir verða settar upp á vissum stað í skólunum þremur eins og tíðkast hefur. Þær koma upp eftir hádegi á mánudögum. Heimasíða  Leitarinnar hefur verið tekin í notkun en þar má jafnframt nálgast þrautirnar og annað sem þeim tilheyrir auk almennra upplýsinga um verkefnið. Slóðin er www.grenndargral.is. Framundan eru 10 vikur fullar af spennandi viðfangsefnum og ljóst að keppnin harðnar með hverju árinu. Við viljum hvetja foreldra og aðra sem koma að uppeldi þeirra sem taka þátt í Leitinni til að aðstoða þau við úrvinnslu þrautanna. Leitin er góður vettvangur fyrir fjölskylduna að koma saman og vinna að sameiginlegu verkefni þar sem allir geta fundið eitthvað við sitt hæfi. Allir geta tekið þátt. Umsjónarmenn verkefnisins eru Brynjar Karl Óttarsson kennari í Giljaskóla, Helga Halldórsdóttir kennari í Glerárskóla og Sigrún Sigurðardóttir kennari í Síðuskóla.