ÍSAT

Valgreinin útivist, hreyfing og skyndihjálp er að hefja sinn þriðja starfsvetur. Í vetur eru 22 nemendur sem koma úr öllum grunnskólum Akureyrar.  Aðalmarkmið valgreinarinnar er að stunda útivist s.s. fjallgöngur, hjólaferðir, skíði og fl.  og einnig að læra skyndihjálp. Fyrsta gönguferðin var farin 8. september og var gengið upp í Fálkafell sem er gamall skátaskáli fyrir ofan bæinn. Þaðan var gengið yfir í Gamla sem er skáli fyrir dróttskáta á Akureyri. Síðan gengum við í gegnum Naustaborgir og heim. Fengum mjög gott veður og mikið var um berjatínslu á leiðinni. Frábær ferð í alla staði og stóðu krakkarnir sig mjög vel. Umsjónaraðili með útivistarvalinu er Anna Sigrún Rafnsdóttir kennari í Síðuskóla. Myndir úr ferðinni má skoða hér.

Á föstudaginn 10. sept. var opið hús í öllum grunnskólum á Akureryri í tengslum við námsstefnu um Byrjendalæsi sem haldin var á vegum skólaþróunar við Háskólann á Akureyri.  Í Síðuskóla komu í heimsókn nær 40 kennarar frá Rimaskóla, Hvaleyrarskóla, Laugarnesskóla, Klébergsskóla, Hafralækjarskóla og Breiðagerðisskóla til að kynna sér starf skólans. Á námsstefnunni í HA sem ætluð var kennurum sem tekið hafa þátt í þróunarstarfinu í Byrjendalæsi, voru fjórir kennarar skólans með málstofu. Margrét Baldvinsdóttir og Sara E. Svanlaugsdóttir, kennarar í 3. bekk, höfðu málstofu um skipulag náms og kennslu í Byrjendalæsi og Laufey Svavarsdóttir og Sigrún Ásmundsdóttir, kennarar í 2. bekk, voru með málstofu þar sem þær fjölluðu um ritun, frá texta að ritun. Sigrún var einnig með málstofu þar sem hún kynnti meistaraverkefni sitt "Læsisnámið þarf að vera skemmtilegt".  Kynningum kennaranna úr Síðuskóla var mjög vel tekið og lífleg umræða í þeirra málstofum. Það er greinilegt að starfið sem unnið er í Byrjendalæsi í Síðuskóla er farið að vekja athygli og það víðar en hjá nemendum og foreldrum þeirra.  

Leitin að grenndargralinu hefst mánudaginn 6. september. Þetta er í þriðja skipti sem nemendur í 8.-10. bekk hefja leit að hinu eftirsóknaverða grali. Hugmyndin að verkefninu fæddist í Giljaskóla sumarið 2008 og um haustið hófu nemendur skólans leit að grenndargralinu í fyrsta skipti. Árið 2009 tók Síðuskóli þátt og nú hefur Glerárskóli bæst í hópinn. Bjóðum við nemendur Glerárskóla velkomna til leiks. Þrautir verða settar upp á vissum stað í skólunum þremur eins og tíðkast hefur. Þær koma upp eftir hádegi á mánudögum. Heimasíða  Leitarinnar hefur verið tekin í notkun en þar má jafnframt nálgast þrautirnar og annað sem þeim tilheyrir auk almennra upplýsinga um verkefnið. Slóðin er www.grenndargral.is. Framundan eru 10 vikur fullar af spennandi viðfangsefnum og ljóst að keppnin harðnar með hverju árinu. Við viljum hvetja foreldra og aðra sem koma að uppeldi þeirra sem taka þátt í Leitinni til að aðstoða þau við úrvinnslu þrautanna. Leitin er góður vettvangur fyrir fjölskylduna að koma saman og vinna að sameiginlegu verkefni þar sem allir geta fundið eitthvað við sitt hæfi. Allir geta tekið þátt. Umsjónarmenn verkefnisins eru Brynjar Karl Óttarsson kennari í Giljaskóla, Helga Halldórsdóttir kennari í Glerárskóla og Sigrún Sigurðardóttir kennari í Síðuskóla.

Matseðill fyrir ágúst og september er kominn inn. Hann má nálgast hér.

Íþróttir Fyrstu þrjár vikur haustannar verðum við úti með íþróttatímana. Nemendur koma þá klæddir eftir veðri  í fötum sem henta til  íþróttaiðkunnar.   Nemendur skulu fara í sturtu eftir íþróttatíma. Geti nemandi ekki tekið þátt í tíma skulu forföll  tilkynnast á skrifstofu skólans.  Gleymi nemandi íþróttafötum/handklæði er í boði að fá lánuð föt einu sinni á hvorri önn. Sund Nemendur mæta með sundföt og handklæði í sundtíma. Ef sundföt gleymast  heima er hægt að fá lánuð sundföt einu sinni á hvorri önn.   Nemendur mega koma með sundgleraugu en slík verða ekki til láns í sundlauginni.  Geti nemandi ekki tekið þátt í tíma skulu forföll  tilkynnast á skrifstofu skólans. 

Ágætu foreldrar / forráðamenn nemenda í Síðuskóla Senn fer nýtt skólaár að hefjast og eins verið hefur síðast liðin ár munu umsjónarkennarar byrja á viðtölum við nemendur og foreldra dagana 23. og 24. ágúst. Boð um viðtalið verður sent á rafrænu formi í vikunni áður. Nú munum við í fyrsta skipti óska eftir því að undirbúningur fyrir viðtölin fari fram í gegnum leiðsagnarmatið í Mentor. Opnað verður fyrir matið þann 17. ágúst en hér aftar í bréfinu má finna leiðbeiningar um gerð þess. Varðandi aðgang að Mentor þá er hægt að sækja hann inn á síðunni mentor.is með því að velja Gleymt lykilorð vinstra megin á síðunni. Þá opnast gluggi þar sem  kennitala er skráð og í framhaldi af því sendir Mentor tölvupóst (mikilvægt er að rétt netfang sé skráð inn á vefinn) þar sem boðið er upp á að búa til lykilorð en notendanafnið er alltaf kennitala. Námsgagnalistar fyrir komandi skólaár má nálgast á heimasíðu skólans siduskoli.is Við hlökkum til að eiga farsælt og gefandi samstarf við ykkur á komandi skólaári eins og undanfarin ár.                                                                  Bestu kveðjur,                                                             stjórnendur Síðuskóla Leiðbeiningar inn á leiðsagnarmatið

Námsgagnalista (áður kallaðir innkaupalistar) fyrir skólaárið 2010 - 2011 má skoða hér fyrir neðan. 1. bekkur        2. bekkur        3. bekkur        4. bekkur        5. bekkur        6. bekkur        7. bekkur        8. bekkur        9. bekkur        10. bekkur