ÍSAT

Kæru foreldrar og forráðamenn barna í Síðuskóla. Eins og við höfum öll orðið vör við á síðustu misserum hefur umhverfi barna okkar breyst mikið með tilkomu spjaldtölva og snjallsíma. Í ofanálag hefur fíkniefnaneysla færst nær okkur á síðustu árum. Líkt og fram kom á aðalfundi FOKS (Foreldra- og kennarafélags Síðuskóla) þann 18. september síðastliðinn hafa aðilar sem tengjast fíkniefnaheiminum verið að þvælast í kringum skólann og í hverfinu, við leiksvæði barnanna okkar. Við í stjórn FOKS viljum bregðast við þessu með því að koma á laggirnar hverfisrölti, miðbæjarrölti og nágrannavörslu. Þetta verður hins vegar ekki gert nema með dyggri aðstoð ykkar. Sá undirbúningur sem þegar hefur farið fram er í samstarfi við forvarnarfulltrúa Akureyrarbæjar, lögregluna, hverfisnefndir o.fl. Skipulagið gerir ráð fyrir að foreldrar barna í 1. - 7. bekk sjái um hverfisrölt í Síðuhverfi en foreldrar barna í 8. - 10. bekk sjái um miðbæjarrölt í samstarfi við foreldra úr öðrum grunnskólum á Akureyri. Hverfisrölt: Hverjum bekk verður úthutað 4 vöktum yfir skólaárið. 5-6 manna hópur verður á ferli gangandi eða akandi þau kvöld sem skilgreind eru sem „gæslukvöld”. Gæslan mun bæði fara fram á virkum dögum og um helgar en að jafnaði er gengið út frá tveimur kvöldum í hverri viku. Bekkjarfulltrúar munu skipuleggja starfið fyrir sinn árgang. Miðbæjarrölt: Hugmyndin er að hverjum skóla verði úthlutaðar 2 helgar á önn. Hver vakt mun standa frá kl. 22:00-01:00, á föstudags- og laugardagskvöldum. Áætlað er að 5-6 foreldrar standi hverja vakt. Hópurinn hittist á lögreglustöðinni og fær þar upplýsingar um áætlun kvöldsins. Nágrannavarsla: Þetta verkefni er á könnu hverfisnefndar Síðuhverfis í samstarfi við FOKS og verður kynnt nánar síðar. Með  því að vera á ferli um hverfið og vera sýnileg verður umhverfi okkar öruggara - með því að standa saman getum við gert heilmikið. Vikukiptingu á bekki má sjá hér í viðhengi. Stjórn FOKS hlakkar til samstarfs við ykkur.

Dagana 25. og 28. október er haustfrí í skólanum.  Opið er í frístund þessa daga fyrir þau börn sem þar eru skráð. Skóli hefst að nýju samkvæmt stundaskrá þriðjudaginn 29. október.                  Við vonum að haustfríið verði ykkur ánægjulegt.     Starfsfólk Síðuskóla                                                                                        

Tveir kennarar, Sigrún Sigurðardóttir og Sigurður Sigurðarson, fóru í heimsókn í Starkenburger Gymnasium í Heppenheim í Þýskalandi.  Tveir nemendur voru dregnir út úr hópi umsækjanda og komust þau Haukur og Snædís, bæði í 9.bekk, með í ferðina. Ferðin hófst föstudaginn 20.sept og 27.sept kom hópurinn brunandi til baka norður yfir heiðar.  Ferðin var einstaklega vel heppnuð, krakkarnir ánægðir og unnu vel í því verkefni sem lagt var í hendurnar á þeim.  Hægt er að sjá afrakstur vinnunnar með því að kíkja á síðuna www.comenius-civix.eu

Á morgun er skipulagsdagur í skólanum og þá verða allir starfsmenn skólans á ráðstefnunni Lærdómssamfélagið – Samstarf og samræða allra skólastiga.  Starfsfólk leikskóla, grunnskóla og framhaldsskóla verður á ráðstefnunni allan daginn. Þetta þýðir að það er frí í skólanum og  frístund er lokuð.

Fimmtudaginn 19. september munum við halda upp á DAG ÍSLENSKRAR NÁTTÚRU. Þá mun skólastarfið fara fram úti í náttúrunni í óhefðbundinni kennslu. Vinsamlegast gætið þess að allir séu klæddir eftir veðri. Skóladegi lýkur þá klukkan 13:00.