ÍSAT

Í dag kom Gunnar Helgason í heimsókn í Síðuskóla og las upp úr nýju bókinni sinni ,,Aukaspyrna á Akureyri". Nemendur 4. - 10. bekkja mættu allir á sal og virtust allir hafa jafn gaman af að hlusta á upplesturinn hjá Gunnari.

Á vefinn eru komin þrjú rit af sex um grunnþætti menntunar. Mennta- og menningarmálaráðuneytið gefur út í samstarfi við Námsgagnastofnun rit um grunnþætti í menntun. Grunn-þættirnir eru kynntir í nýjum aðalnámskrám leikskóla, grunnskóla og framhaldsskóla 2011.  Grunnþættirnir eru: Læsi í víðum skilningi Sjálfbærni Heilbrigði og velferð Lýðræði og mannréttindi Jafnrétti Sköpun Grunnþættirnir snúast um læsi á samfélag, menningu, umhverfi og náttúru; einnig um framtíðarsýn, getu og vilja til að hafa áhrif og taka virkan þátt í að viðhalda samfélagi sínu, breyta því og þróa. Þeim er ætlað að undirstrika meginatriði í almennri menntun, stuðla að samfellu í skólakerfinu og ná til starfshátta, inntaks og námsumhverfis á öllum skólastigum. Heftunum er m.a. ætlað stuðla að því að grunnþættirnir verði leiðarvísar í skólastarfinu, auðvelda starfsfólki skóla, kennurum og skólastjórum að átta sig á inntaki þeirra og flétta þá inn í skólastarfið. Ekki er um beinar kennsluleiðbeiningar að ræða heldur má finna í þeim stutta fræðilega umfjöllun um hvern þátt, hugmyndir um leiðir og hagnýtar ábendingar. Að þessu sinni koma út þrjú rit, um sköpun, læsi og lýðræði og mannréttindi. Stefnt er að því að seinni þrjú ritin komi út í byrjun næsta árs. Öll ritin eru gefin út á rafrænu formi og í takmörkuðu upplagi á prentuðu formi. Rafrænu útgáfuna má nú nálgast í útgáfuskrá ráðuneytisins og vef Námsgagnastofnunar.  Grunnþættir menntunar – Læsi Grunnþættir menntunar – Sköpun Grunnþættir menntunar – Lýðræði og mannréttindi

Stóra upplestrarkeppnin" í 7. bekk var sett á Degi íslenskrar tungu þann 16. nóvember. Sigurvegararnir okkar frá því í fyrra þeir Steinar Logi Stefánsson og Jörundur Guðni Sigurbjörnsson komu og lásu ljóð fyrir hópinn. Nú í ár verður upplestrarkeppni hér innanhúss í 4. bekk og mætti sá hópur líka á sal. Áralöng hefð er fyrir því að nemendur í 8.-10. bekk í grunnskólunum á Akureyri hittist á Degi íslenskrar tungu. Nemendur í 8. bekk hittust í Brekkuskóla, 9.bekkingar hittust í Síðuskóla og nemendur 10. bekkjar í Lundarskóla. Íslenskukennarar ákveða, í samráði við nemendur þema dagsins og í ár var ákveðið að vinna með þjóðsögur. Nemendurnir í Síðuskóla sýndu leikþætti um Bakkabræður. Heimsóknirnar gengu afar vel og voru allir ánægðir með daginn. Myndir frá atburðunum má sjá hér. 

Öðruvísi dagar  vikuna 19. - 23. nóvember. Þá er komið að hinum skemmtilegu dögum þar sem við brjótum upp þetta hefðbundna.  Mánudaginn 19. nóvember er íþróttafatadagur. Þann dag klæðast allir einhverri íþróttaflík.  Þriðjudaginn 20. nóvember er grímudagur. Allir verða með grímu hvort sem hún er keypt, heimatilbúin eða máluð á andlitið að morgni. Miðvikudaginn 21. nóvember er jólaþemadagur. Nú er um að gera að vera svolítið frumlegur. Á öllum heimilum er til eitthvað sem tengt er jólunum og hægt að klæðast eða skreyta sig með. Ef ekki þá dugar eitthvað rautt. Fimmtudaginn 22. nóvember er höfuðfatadagur. Þennan dag vonumst við til þess að fjölbreytnin verði mikil. Föstudaginn 23. nóvember er fínn föstudagur. Þá koma allir í sínu fínasta pússi (innan skynsamlegra marka). Góða skemmtun Nemendaráð

Við munum verða með einn söludag í viðbót á Síðuskólapeysunum. Nemendur 10. bekkjar eru að safna fyrir skólaferðalagi vorið 2013 og mun allur ágóði af peysusölunni renna í ferðasjóð þeirra. Peysurnar verða seldar  fimmtudaginn 1. nóv frá 17:00- 19:00 á kaffistofu starfsmanna í ritararýminu (gengið inn um íþróttahúsið).  Peysurnar kosta kr. 5500 og einungis er hægt að borga með peningum. Ef keyptar eru tvær eða fleiri peysur þá kostar peysan kr. 5000. Peysur þarf að greiða við pöntun. Peysurnar hlaupa um ½ númer við fyrsta þvott mjög gott að þvo þær á röngunni. Kær kveðja Nemendur og foreldrafulltrúar í 10. bekk Síðuskóla

Hettupeysurnar eru á leiðinni norður.  Þær verða afhentar föstudaginn 19. okt í matsal Síðuskóla á milli 15:00-16:00. Foreldrar og nemendur í 10. bekk. 

Nú er þemadögum lokið og var dagurinn í dag ekki síður skemmtilegur en dagurinn í gær. Haldið var áfram að syngja, dansa, útbúa veggmyndir, leika leikrit og búa til hina ýmsu töfraheima.  Nemendur og starfsfólk eiga hrós skilið fyrir frábæra daga og hér má sjá myndir frá öllu fjörinu.