ÍSAT

Nemendur 5. bekkjar hafa undanfarna föstudaga verið að læra félagsvist undir leiðsögn kennara sinna, þeirra Huldu og Hrannar. Markmiðið er að grípa í spilin á hverjum föstudegi núna í nóvember. Myndin sem hér fylgir er frá sl. föstudegi þegar nemendur spiluðu félagsvist, og ekki annað sjá en allir skemmti sér hið besta.

Í dag, 11. nóvember er þemadagur í Síðuskóla. Að þessu sinni eru íþróttir, tónlist og dans þeir þættir sem við leggjum áherslu á. Nemendur var skipt í hópa eftir stigum þannig að á yngsta stigi eru aldursblandaðir hópar nemenda í 1. - 4. bekk, síðan blandast 5. - 7. bekkingar saman í hópa og unglingarnir í 8. - 10. bekk blandast og skiptast svo í sex hópa.  Hver hópur fer á 6-7 stöðvar um morguninn. Í boði eru útileikir, heilaleikfimi eða spil, fjöltefli, dans, jóga, fjöldasöngur, tónlistarsaga, tarsanleikur, orusta í íþróttasal svo dæmi séu nefnd. Nemendaráð tók að þessu sinni að sér undirbúning þemadags og kom með tillögu að útfærslu og hugmynd að verkefnum á stöðvum. Nokkrir nemendur af unglingastigi tóku að sér að stýra stöðvum með aðstoð kennara s.s. dansi og fræðslu og grunnæfingum í jui-jitsu.  Það er gaman þegar allir leggjast á eitt við að láta svona uppbrotsdag ganga upp. Allir sinntu sínu með sóma, bæði starfsfólk og nemendur :) Hér má sjá nokkrar myndir frá deginum.

Í dag, 8. nóvember, er baráttudagur gegn einelti. Við í Síðuskóla lögðum okkar að mörkum með ýmsum hætti. Í morgun var samverustund á sal þar sem yngsta stigið kom saman, rætt var um samskipti og 4. bekkur sýndi leikrit sem undirstrikaði mikilvæg atriði í samskiptum. Eftir löngu frímínútur fóru svo allir út, bæði nemendur og starfsfólk og mynduðu vináttukeðju á skólalóðinni. Þrjár stúlkur í þriðja bekk útbjuggu vinabönd handa bekkjarfélögum, sjá nánar á bekkjarsíðu 3. bekkjar. Hérna má sjá myndir frá deginum.

Sú hefð hefur myndast að 7. bekkur taki þátt í verkefninu ,,Jól í skókassa“ sem er á vegum KFUM/K á Íslandi. Krakkarnir safna öllu mögulegu í skókassana og leggur hvert þeirra fram 1200 kr. t.d. til að kaupa nauðsynjavörur sem á að fara í kassana. Það eru munaðarlaus og fátæk börn í Úkraníu sem fá jólaglaðning frá okkur en jólin hjá þeim er 7. janúar. Hér má sjá myndir frá því er 7. bekkur vann að verkefninu.

Í gær, fimmtudaginn 3. nóvember, fengum við góða heimsókn í skólann. Þá kom blásarasveit úr Tónlistarskólanum, undir stjórn Ellu Völu Ármannsdóttur, og spilaði fyrir nemendur á yngsta stigi. Ella Vala kynnti einnig hljóðfærin fyrir nemendum milli laga. Ekki var annað að sjá en nemendur skólans kynnu vel að meta tónlistina, og var hljómsveitinni vel tekið. Myndin sem fylgir fréttinni sýnir hljómsveitina og Ellu Völu stjórnanda hennar.

Í dag, 26.október, hófst skólinn eftir haustfrí hjá nemendum á unglingastigi með félagsvist.  Spilað var á 28 borðum í matsal skólans.  Félagsvistin tókst vonum framar og verður eflaust endurtekin fljótlega á meðan krakkarnir muna enn reglurnar.  

Myndir frá bleika deginum föstudaginn 14. október. Það var ánægjulegt hver margir klæddust bleiku á föstudaginn. Það á bæði við um nemendur á starfsfólk. Jói fór í göngutúr með myndavélina og myndaði nokkra bleika og brosandi.

Í foreldraviðtölum í næstu viku munu nemendur í 10.bekk bjóða peysur til sölu. Peysurnar eru merktar Síðuskóla og fást í nokkrum litum. Einnig stendur til boða að merkja peysurnar með nöfnum eða gælunöfnum. Merkingarnar eru líka í nokkrum mismunandi litum. Peysurnar eru bæði til heilar og renndar.  Heilar kosta 6000 og fást í s – xxl  og renndar kosta 6500 krónur og sömu stærðir í boði. Öllum nemendum skólans stendur til boða að kaupa sér peysu. Hér eru myndir

Fyrir skömmu voru gerð myndbönd um hlutverk skólaráða og nemendafélags í grunnskólum. Heimili og skóli ásamt fleiri hagsmunaaðilum stóðu að gerð myndbandananna. Hægt er að smella hér til að sjá myndbandið um nemendaráð og hér til að sjá skólaráðsmyndabandið.

Föstudaginn 14. október eru nemendur og starfsmenn hvattir til að klæðast bleiku en þannig sýnum við Krabbameinsfélaginu stuðning í baráttunni gegn brjóstakrabbameini.