ÍSAT

Í dag, 31. maí var Grænfáninn afhentur í Síðuskóla í 6. sinn en við fengum hann fyrst árið 2006. Athöfnin í dag var haldin í íþróttahúsi og var hátíðleg og skemmtileg. Veittar voru viðurkenningar fyrir myndasamkeppni í tengslum við umhverfismál og 4. bekkur sem henti minnstu í keppninni um minnstu matarsóunina fékk viðurkenningu. Þarna voru flutt tónlistaratriði og þrír fulltrúar nemenda í umhverfisnefnd fluttu stutt erindi. Hér má sjá nokkrar myndir frá þessari skemmtilegu athöfn.

Á föstudaginn sl. var söngsalur hjá okkur og úrslit í lestrarkeppninni kynnt í leiðinni. Þar voru veitt verðlaun á hverju stigi og síðan fékk bekkurinn sem las mest, verðlaun. Verðlaunahafarnir voru Bergur í 10. bekk, Halldór Birgir í 7. bekk, Svavar Máni Geislason í 5. bekk og Íris Embla í 3. bekk sem fengu viðurkenningu og 3. bekkur fékk bekkjarverðlaunin, en hann fær ísveislu. Á myndinni með fréttinni má sjá verðlaunahafa fá verðlaunin afhent. Hér má líka sjá fleiri myndir frá verðlaunaafhendingunni og söngsal.  

Nemendur í 1. bekk hafa verið að læra um húsdýr. Þau hafa fengið fræðslu um dýrin, smíðað sitt eigið dýr, búið til hugtakakort og sögur um dýrið sitt. Þegar verkefninu var lokið buðu þau foreldrum sínum í skólann í kaffi og kökur og sögðu þeim frá húsdýrunum. Myndin sem fylgir fréttinni er frá þeirri sýningu.

Hin árlega Vorhátíð Síðuskóla verður haldin sunnudaginn 8. maí n.k. klukkan 14:00-16:00 Hátíðin hefst með smá athöfn á sal skólans. Á vorhátíðinni verður margt í boði s.s.: Kökuhlaðborð, Andlitsmálning, Hoppukastalar, Tombóla, Grillaðar pylsur, Popp og svali, Töframaður, Söngatriði. Vonumst til að sjá sem flesta Foreldra- og kennarafélag Síðuskóla

Að vanda stendur UFA fyrir 1. maíhlaupi í ár. Sem fyrr verður um keppni á milli skóla að ræða og eru nemendur hvattir til að taka þátt og skapa þannig skemmtilegan viðburð um leið og þeir spretta úr spori. Nánari upplýsingar má sjá í hér. 

UNICEF hlaupið var haldið í Síðuskóla í morgun. Það er fræðslu- og fjáröflunarverkefni þar sem íslenskum börnum gefst tækifæri á að fræðast um aðstæður jafnaldra sinna víða um heim og með hollri hreyfingu safna fé fyrir starfi í þágu barna í fátækari ríkjum heims. Nemendur fá fræðslu um líf barna í löndum sem UNICEF starfar í og safna áheitum í sínu nánasta umhverfi. Heitið er á frammistöðu þátttakenda í sérstöku "apahlaupi" sem fram fer á góðgerðardaginn. Það þýðir að styrktaraðilar heita upphæð að eigin vali á hverja vegalengd sem börnin eiga að reyna að hlaupa/ganga eins oft og þau geta og vilja innan ákveðins tímaramma. Við í Síðuskóla tókum að sjálfsögðu þátt og stóðu nemendur sig mjög vel, en myndir frá hlaupinu má sjá hér. Hér má svo sjá fleiri myndir af eldra stigi.

Kæru foreldrar og skólafólk.   Við minnum á að frestur til að skila inn tilnefningum til Foreldraverðlaunanna rennur út  á morgun, þann 27. apríl.   Hægt er að senda inn tilnefningar  hér:    Einnig er hægt að tilnefna sérstaklega til dugnaðarforkaverðlauna:  

Í morgun, þann 22. apríl var haldin söngkeppni í Síðuskóla. Það var nemendaráð skólans sem stóð fyrir þessari keppni sem tókst einstaklega vel og er vonandi komin til að vera. Áheyrendur stóðu sig einnig með stakri prýði. Nemendum í 5. - 10. bekk var frjálst að taka þátt en þarna voru flutt 10 lög. Það var Arnviður Bragi Pálmason í 5. bekk sem sigraði, önnur var Ína Soffía Hólmgrímsdóttir í 7. bekk og í þriðja sæti voru þrjár "kryddaðar" stúlkur ír 10. bekk, þær Jóna Guðný Pálsdóttir, Hulda Björg Hannesdóttir og Rakel Anna Boulter. Hér má sjá myndir. 

Miðvikudaginn 20. apríl var lokakeppnin í Skólahreysti þar sem sigurvegarar úr keppnum heima í héraði komu saman. Rúta með rúmlega 70 farþega lagði upp frá skólanum að loknum hádegisverði og voru þar á ferð keppendur, íþróttakennarar og stuðningslið. Ferðin gekk vel og allir stóðu sig með sóma jafn keppendur sem stuðningsmenn. Að lokinni keppni var svo ekið aftur heim svo dagurinn var langur hjá ferðalöngum en afar ánægjulegur. Í morgun var skólahreystiliðið kallað á svið svo nemendur skólans gætu gefið þeim gott klapp fyrir frammistöðuna. Sjá hér. Hér má sjá myndir úr ferðinni.