ÍSAT

Mánudaginn 12. október komu báðir 9. bekkirnir í heimsókn í 1.bekk og spiluðu við nemendur þar og eins aðstoðuðu unglingarnir yngstu nemendur í stærðfræði.   Báðir árgangarnir voru spenntir fyrir þessu uppbroti og óhætt er að segja að þetta hafi tekist vel.  Svo skemmtilega vill til að það eru fern systkinapör í þessum bekkjum og voru yngri systkinin ákaflega glöð að fá þau eldri í heimsókn.   Allir krakkarnir stóðu sig frábærlega og unnu vel saman.  Þau eldri voru góð fyrirmynd fyrir þau yngri, aðstoðuðu, hrósuðu og voru sallaróleg með þeim.  Unglingarnir voru ánægðir með þetta eftir á, fannst þetta skemmtilegt uppbrot og gaman að vera með þeim yngstu. Hér eru nokkrar myndir sem teknar voru í tímunum.

Í dag komu góðir gestir frá íþróttafélaginu Akri færandi hendi en þeir gáfu skólanum nýja borðtennisspaða. Þeir koma sér vel þar sem foreldrafélagið gaf skólanum nýtt borðtennisborð við upphaf skólaárs. Íþróttafélagið Akur er með æfingar mánudaga 16:30-18:00, miðvikudaga og föstudaga 17:00-18:30 og er öllum velkomið að koma og prófa.

Átakið "gengið í skólann" stendur yfir þessa dagana. Kennarar skrá hjá sér hvernig nemendur koma í skólann, þ.e. hvort þeir ganga, hjóla eða koma með bíl. Við hvetjum nemendur til að ganga eða hjóla á meðan við erum enn laus við snjó og hálku. Fyrstu vikuna sem átakið stóð yfir komu 92% gangandi eða á hjóli.

Úrslit í keppninni um Náttúrufræðing Síðuskóla voru tilkynnt í morgun. 

Í dag er dagur íslenskrar náttúru. Allir nemendur í 2. bekk og eldri tóku þátt í keppninni um Náttúrufræðing Síðuskóla þar sem menn reyna að bera kennsl á sem flestar myndir fuglum, plöntum og landslagi. Úrslit verða vera kunnkjörð á morgun þar sem Náttúrfræðingur verður tilnefndur og viðurkenningar fyrir góðan árangur veittar.  Nemendur Síðuskóla voru á faraldsfæti í dag þar sem víða var komið við. Veðrið hefði getað verið skemmtilegra en við því er ekkert annað ráð en klæða sig vel. Hér má sjá myndir frá vettvangsferð 7. bekkinga.

Fyrsti söngsalur skólaársins var haldinn fimmtudaginn 10. september. Í þetta sinn völdu 1. og 6. bekkur lögin sem sungin voru. Hér má sjá myndir.

Norræna skólahlaupið fór fram í blíðskaparveðri s.l. þriðjudag.  Allir sem vettlingi gátu valdið hlupu 2.5 km hring í hverfinu. Svavar Sigurðarson körfuboltakappi og fyrrum nemandi við Síðuskóla, kom og veitti sigurvegurunum verðlaun. Hér má sjá myndir

Í dag 8. september er alþjóðadagur læsis. Nemendur í 5. bekk afhentu fræðsustjóra, Soffíu Vagnsdóttur þetta fína póstkort sem þeir höfðu skrifað til einhverrar persónu um mikilvægi lesturs. Soffía safnaði saman kortunum og er ætlunin að pósleggja þau til viðtakenda. Allir nemendur fengu á dögunum svona kort til að minna á mikilvægi læsis og hvernig það opnar okkur í raun dyr að öllum heiminum. Myndir úr 5. bekk       

Í vetur er boðið upp á dönskuval í skólanum. Um er að ræða samstarfsverkefni fjögurra skóla, Gilja-, Glerár- og Síðuskóla á Akureyri og Börnenes Friskole í Aarhus í Danmörku. Nemendur í þessu vali eru 30 og danski bekkurinn telur 19 nemendur. Sótt var um styrk til Nordplus Junior sem mun fjármagna þetta verkefni að mestu.  Dönsku nemendurnir koma í heimsókn til Akureyrar í vikunni 6. - 12. september. Unnin verða verkefni á dönsku sem tengjast Danmörku og Íslandi. Að auki verður farið í ýmsar ferðir s.s. heimsókn í Mývatnssveit, útsýnisferð um Akureyri og að lokum munu dönsku nemendurnir fara í Skagafjörð. Dönsku nemendurnir munu gista á gistiheimili, á heimilum íslensku nemendanna og síðustu nóttina mun svo allur hópurinn gista saman í Glerárskóla.  Í apríl mun íslenski hópurinn svo fara til Aarhus þar sem áfram verða unnin sameiginleg verkefni auk ýmissar afþreyingar.  Líklegt er að starfsfólk og nemendur skólans verði varir við erlenda gesti á göngum skólans í næstu viku og vonum við að vel verði tekið á móti þeim.