ÍSAT

Hér er að finna nokkrar myndir úr skólastarfinu sem teknar voru í dag. 

Dagarnir í skólanum hafa verið óvenjulegir að undanförnu vegna takmarkana sem settar hafa verið vegna sóttvarna. Þrátt fyrir smávægilegar tilslakanir í síðustu viku eru nemendur enn í sínum hólfum með sínum kennurum og matast í minni hópum en venjulega. Hér má sjá myndir sem teknar voru í morgun en þar var 4. bekkur í íþróttum með sínum umsjónarkennara, 3. bekkur að borða í íþróttasalnum og 1. bekkur var úti á sínu svæði í frímínútum eftir matinn. Nemendur hafa ekki kippt sér mikið upp við þessar breytingar og hafa staðið sig einstaklega vel og allir eru glaðir eins og sjá má á myndunum með fréttinni.

Krakkarnir í 5. bekk föndruðu jóladagatal fyrir bekkinn í morgun. Jólaandinn sveif yfir, enda hvít jörð úti fyrir. 

Hér eru nokkrar myndir. 

Undanfarin ár hefur dönskukennari í skólanum verið í Nordplus samstarfi við gerð og þýðingu rafbóka. Upphaflega voru það bara Norðurlöndin sem unnu saman að verkefninu en árið 2019 bættust lönd við þar sem Norðurlandbúar sækja skóla, s.s. Þýskaland, Eistland og Litháen. 

Markmið verkefnisins er að tengja löndin saman á auðveldan hátt í gegnum rafrænt bókasafn sem allir hafa aðgang að, ókeypis. Auk þess er kynning á menningu hvers lands í gegnum einfaldan texta sem hentar grunnskólabörnum.
Kennari og nemendur í Síðuskóla hafa búið til bækur og þýtt aðrar af dönsku og sænsku. Nemendur á miðstigi hafa lesið inn á bækur þannig að grunnskólabörn í öðrum löndum geti hlutstað á íslenskuna. Rafbækurnar hafa að geyma ýmsan fróðleik um hvert land og það sem hæst ber á góma í heiminum eins og Heimsmarkmiðin. Bækurnar eru góðar sem yndislestur og í kennslu þar sem hægt er að búa til margvísleg verkefni úr hverri bók. 

Hér má nálgast bækurnar http://atlantbib.org/ en einnig er hægt að fara í flipann "Skólinn" hér að ofan og finna tengil undir "Þróunarverkefni".

Undanfarnar vikur hefur staðið yfir lestrarátak í 3. bekk, sem lauk í síðustu viku. Nemendur hafa keppst við að lesa sem flestar Herramanna- og Ungfrúa- bækur. Fyrir dugnaðinn fengu þau viðurkenningarskjöl og á myndinni sem fylgir fréttinni má sjá nokkrar stoltar stelpur með viðurkenningarnar sínar.

Fyrirkomulag kennslu verður með breyttu sniði næstu fjóra daga skv. reglugerð sem tekur gildi á morgun og gildir til og með 17. nóvember nk. Foreldrar fengu póst á frá skólanum í dag. Hér má sjá þær upplýsingar sem fóru, yngsta stig, miðstig og unglingastig. Hægt er að sjá kort af skólanum með inngöngum sem notast verður við í myndinni sem fylgir fréttinni.

Ný reglugerð heilbrigðisráðherra um takmörkun á skólastarfi vegna hertra sóttvarnaaðgerða tekur gildi 3. nóvember. Sett er það markmið að sem minnst röskun verði á skólastarfi og að starf á leikskólastigi og á fyrsta stigi grunnskóla verði óskert. Að ráði sóttvarnalæknis verður reglu um grímuskyldu breytt þannig að hún eigi ekki við um börn fædd 2011 og síðar.

Reglugerðin byggist á tillögum sóttvarnalæknis um hertar sóttvarnaaðgerðir til að sporna við útbreiðslu COVID-19 faraldursins og er unnin í samráði við mennta- og menningarmálaráðuneytið. Hún tekur til leikskóla, grunnskóla, tónlistarskóla, framhaldsskóla, framhaldsfræðslu og háskóla, hvort sem um ræðir opinbera eða einkarekna skóla. Reglugerðin tekur einnig til annarrar starfsemi, svo sem frístundaheimila og félagsmiðstöðva, íþrótta-, æskulýðs- og tómstundastarfs.

Helstu aðtrið sem gilda um grunnskóla

• Fyrsta skólastig, þ.e. 1.–4. bekkur: Nemendur eru undanþegnir 2 metra nálægðartakmörkun og þurfa ekki að nota andlitsgrímur. Alls mega 50 nemendur vera í sama rými. Sömu reglur gilda um frístundaheimili fyrir nemendur í 1.–4. bekk.
• 5.–10. bekkur: Nemendur mega að hámarki vera 25 í hverju rými. Um þá gilda 2 metra nálægðartakmörk og ef ekki er hægt að uppfylla þau skulu nemendurnir nota grímu. Starfsfólk skal jafnframt halda 2 metra regluna og nota grímu sé það ekki mögulegt.
• Starfsfólk grunnskóla: Ekki skulu vera fleiri en 10 starfsmenn í hverju rými en starfsmönnum er heimilt að fara á milli hópa. Starfsmenn skulu virða 2 metra regluna sín á milli og gagnvart nemendum í 5.–10. bekk. Sé það ekki hægt skulu þeir bera grímur.
• Fjöldamörk og blöndun hópa: Halda skal sömu hópaskiptingu nemenda í grunnskólastarfi og á frístundaheimilum þannig að ekki verði blöndun milli nemendahópa. Í sameiginlegum rýmum skóla er heimilt að víkja frá fjöldatakmörkum og reglu um blöndun hópa, að því gefnu að nemendur í 5.–10. bekk og starfsfólk noti grímu.
• Skipulagt íþrótta-, æskulýðs- og tómstundastarf, þ.m.t. starf félagsmiðstöðva, barna á grunnskólaaldri er óheimilt.

Upplýsingar um hvernig við munum framfylgja reglunum munu birtast hér á morgun og verða einnig sendar til foreldra og forráðamanna.