ÍSAT

Hér má sjá þau bréf sem skólastjóri sendi í morgun á foreldra og forráðamenn varðandi COVID-19. Þetta eru bréf til foreldra/forráðamanna á íslensku, ensku, pólsku. Einnig er hér að finna bréf almannavarna til fræðsluaðila.

Í morgun var haldið skákmót í 4. og 5. bekk. Í vetur hefur verið skákkennsla í 3. – 5. bekk sem hefur verið í höndum Áskels Kárasonar. Mótið var vel sótt og eins og myndirnar sýna skein einbeiting úr hverju andliti.

Þar sem búið er að staðfesta COVID-19 smit á Íslandi viljum við benda á viðbragðsáætlun Síðuskóla við heimsfaraldri en hana má finna á heimasíðu skólans undir hagnýtt efni.  Hægt er að fylgjast með gangi mála á vef Almannavarna og Landlæknis.

Viðbragðsáætlunina er að finna hér. 

Í morgun voru tilkynnt úrslit í 100 miða leik skólans en leikurinn er hluti af SMT skólafærni. Alls voru 10 nemendur dregnir út og fóru þeir með Malla og Helgu, deildarstjórum skólans, í heimsókn í Háskólann á Akureyri. Þar voru gerðar tilraunir auk þess sem nemendur fengu áhugaverðan fróðleik um Mars. Að því loknu var farið í Bakaríið við brúnna þar sem allir völdu sér góðgæti. Hér má sjá myndir frá úrslitunum í morgun sem og ferðinni.

Mánudaginn 24. febrúar var undankeppni Stóru upplestrarkeppninnar haldin hér í Síðuskóla. Þá lásu 10 nemendur úr 7. bekk sem komust höfðu áfram úr forvali. Allir lesararnir stóðu sig vel og eru svo sannarlega reynslunni ríkari eftir þátttökuna. Tveir aðalfulltrúar voru valdir auk eins varafulltrúa til að taka þátt í úrslitum Stóru upplestrarkeppninnar sem haldin verður í Kvosinni í Menntaskólanum á Akureyri 4. mars næstkomandi. Fulltrúar Síðuskóla í ár eru Rebekka Nótt Jóhannsdóttir, Stefán Andri Björnsson og Ísabella Sól Hauksdóttir til vara. Dómarar voru þau Brynjar Karl Óttarsson kennari í MA og Bryndís Valgarðsdóttir skólastjóri í Hlíðarskóla. Hér má sjá myndir frá keppninni.

Dagur stærðfræðinnar var 7. febrúar sl. Í Síðuskóla var uppbrot í tímum í tilefni dagsins. 1. bekkur tók virkan þátt í deginum en þar voru settar upp fjórar stöðvar. Stöð 1 var peningastöð þar sem nemendur "keyptu" vöru sem búið var að verðleggja og þurftu að finna réttu upphæð og afhenda kennara. Ef keyptar voru tvær vörur máttu nemendur nota reiknivél. Á stöð 2 var litamynstur, á stöð 3 voru tangram og numbers í Numicon og á 4. stöðinni var stærfræðiþrautabraut. Í brautinni var búið að setja stærfræðiþraut sem þau þurftu að leysa til að komast áfram og einnig var þraut þegar komið var í mark sem þurfti að leysa til að mega fara annan hring. Hér má sjá myndir frá deginum.

Opið hús fyrir foreldra barna sem hefja nám í grunnskóla haustið 2020 verður fimmtudaginn 13. febrúar kl. 9-11. Við hvetjum foreldra/forráðamenn til að koma á þeim tíma og kynna sér skólann.

Á föstudaginn komu nemendur skólans saman í hátíðarsalnum og tóku lagið með Heimi Bjarna Ingimarssyni. Sunginn var skólasöngur Síðuskóla auk vel valdra óskalaga og afmælissöngs fyrir heppinn nemanda sem átti afmæli þennan dag. Myndir frá söngsalnum má skoða með því að smella hér.