Fréttir

Nú fer þessu skólaári senn að ljúka og hér eru upplýsingar um það helsta sem framundan er fram að skólalokum. Síðasti kennsludagur er fimmtudaginn 6. júní en skólaslit verða 7. júní eftir því sem hér segir:  1.-4. bekkur kl. 09:00  5.-9. bekkur kl. 10:00 Nemendur fara fyrst á sal en fara síðan með umsjónarkennurum í sínar stofur. Skólaslit hjá 10. bekk verða í Glerárkirkju kl. 17:00. Í morgun fór 10. bekkur af stað í skólaferðalag og kemur til baka á föstudaginn þann 31. maí. Ljóst er að veðrið mun leika við ferðalangana og ekki slæmt að ljúka grunnskólagöngunni í blíðviðrinu. Þetta árið er ferðinni heitið til Skagafjarðar og verður þar margt til gamans gert. Umhverfisdagar verða í skólanum miðvikudaginn 5. júní og fimmtudaginn 6. júní. Þá daga fer annars konar nám fram hjá nemendum, nám sem er ekki síður mikilvægt en hið hefðbundna sem fram fer í skólastofunum. Skólatíminn er frá kl. 8:00 þessa daga og lýkur kl. 12:30. Frístund er opin fyrir þá sem þar eru skráðir. Nemendur þurfa að vera klæddir til útiveru þessa daga. Hér má sjá skipulag Umhverfisdaganna. Hér má sjá töflu sem sýnir hverjir verða umsjónarkennarar bekkjanna á næsta skólaári. Skólasetning næsta árs verður 22. ágúst. Skóladagatal 2013-2014 kemur á heimasíðuna á næstu dögum.

Foreldrar nemenda í 10 bekk buðu börnunum og umsjónarkennrum þeirra í fínan mat á sal skólans kvöldið fyrir skólaferðalagið þeirra.   Hér má sjá myndir frá kvöldverðinum sem tókst í alla staði mjög vel.

Fyrsti bekkur er að læra um fjöruna og hafið. Af því tilefni fórum við í gönguferð í fjöruna til að skoða lífríki hennar. Leið okkar lá um gangstéttir bæjarins yfir móa, mela og þúfur. Síðan  komum við að klöppum þar sem allir fengu að spreyta sig í klettaklifri.  Þar sem krakkarnir stóðu efst upp á klettinum blasti við þeim þessi flotta vík sem í daglegu tali er talað um Sílabás, en þangað lá leið okkar. Veðurguðir voru okkur hliðhollir og við dvöldum lengi þarna, nemendur óðu misdjúpt í leit að fjársjóði og fyrir vikið voru þeir misblautir á heimleiðinni. Allir stóðu sig vel og við gátum ekki merkt annað en að allir hefðu skemmt sér vel.  Hér má sjá fullt af skemmtilegum myndum úr ferðinni.

Dagana 13.-15. maí voru nemendur fjórða bekkjar í skólabúðum á Kiðagil í Bárðardal. Þeir heimsóttu fjárhúsin á Svartárkoti bæði á mánudag og þriðjudag og fengu að spreyta sig við ýmis störf tengd sauðburði. Farið var í gönguferð um staðinn og krakkarnir fræddir um húsendur og reykhúsið. Svo fengu þeir sem vildu, að fara á hestbak. Á miðvikudagsmorgun var fjósið á Halldórsstöðum heimsótt þar sem nemendur fengu að prófa að mjólka. Ferðin tókst vel og komu allir heim reynslunni ríkari. Hérna má sjá myndir úr ferðinni.

Fyrsti bekkur fór í gönguferð í veðurblíðunni föstudaginn 24. maí.  Markmiðið með ferðinni var að skoða kindur og lömbin þeirra. Geiri Vald sem á fjárhús leyfði okkur að koma og skoða hjá sér. Fjárhúsið hans er rétt hjá Trésmíðaverkstæðinu Hyrnu.  Börnin voru mjög áhugasöm og fengu einnig að kíkja á hestana. Hér má sjá myndir frá heimsókninni.

Í dag þriðjudaginn 21. maí buðu nemendur í 10. bekk og foreldrar þeirra öllu starfsfólki Síðuskóla í kaffi. Einn nemandi hélt ræðu þar sem hann fyrir hönd 10. bekkingana þakkaði starfsfólkinu frábæra umönnun sl. 10 ár. Starfsfólk og nemendur gæddu sér svo saman  á stórglæsilegu kaffihlaðborði eins og sést á meðfylgjandi myndum.

Slysavarnafélagið Landsbjörg, í samvinnu við Alcoa Fjarðarál, Dynjanda ehf, EFLA verkfræðistofu, Eflingu stéttafélag, HB Granda, Isavia, Landsvirkjun, Neyðarlínuna, Tryggingamiðstöðina, Umferðarstofu og Þekkingu, gefa þessa dagana öllum skólum á landinu endurskinsvesti til að nota í vettvangsferðum barna í 1. bekk.  Um 4500 börn eru í árganginum á landinu öllu. Í morgun komu tvær konur úr björgunarsveitinni Súlum færandi hendi. Þær voru að færa Síðuskóla svona vesti. Hér má sjá fleiri myndir.  

Vikuna 14. til 21. apríl dvöldu 7 nemendur úr 10.bekk í Síðuskóla, í Árósum í Danmörku ásamt 15 nemendum úr Glerár- og Giljaskóla. Nemendurnir hafa verið í dönskuvali í vetur en það  byrjaði í haust með heimsókn barna úr Børnenes Friskole í Árósum til okkar. Ferðin okkar var fjármögnuð með styrk frá Nordplus junior, en auk þess fékk hópurinn styrk frá Kjarnafæði og Norðurorku. Skólarnir þrír hafa einnig styrkt verkefnið. Krakkarnir dvöldu á dönskum heimilum stóran hluta ferðarinnar og fengu þannig að upplifa danska siði og venjur.  Vikan var mjög viðburðarík, krakkarnir kynntu m.a. þau verkefni sem þeir hafa unnið í vetur, fóru í heimsókn á Aros listasafnið og í Den gamle by, þar sem unnin voru verkefni og farið í ratleik. Vinabær Akureyrar, Randers, bauð hópnum í Randers Regnskov sem var mikil upplifun fyrir alla. Ekki má gleyma viðkomu i Tivoli Friheden en þar skemmtu krakkarnir sér konunglega. Síðasta kvöldið komu allir saman á sveitabæ, heima hjá einum nemandanum og voru grillaðar pylsur og krakkarnir fengu að baka sér snobrød  yfir opnum  eldi. Danska rúgbrauðið fór vel í flesta og allir komu glaðir heim reynslunni ríkari og danskari en áður með margar góðar minningar í farteskinu. Sjá myndir