Fréttir

 Flötur, samtök stærðfræðikennara, hvetur skóla til að gera stærðfræði sérstaklega hátt undir höfði fyrsta föstudag í febrúar ár hvert.  Við í Síðuskóla höfum tekið virkan þátt í mörg ár og skipulagt dag stærðfræðinnar sérstaklega. Að þessu sinni unnu nemendur á hverju stigi saman og voru verkefnin fjölbreytt en þó öll á einhvern hátt tengd þemanu stærðfræði og spil. Í íþróttasal voru leikir tengdir stærðfræði. Markmið með degi stærðfræðinnar er tvíþætt. Það er að vekja nemendur og sem flesta aðra til umhugsunar um stærðfræði og hlutverk hennar í samfélaginu, einnig að fá nemendur til að koma auga á möguleika stærðfræðinnar og sjá hana í víðara samhengi. Ekki var annað að sjá en nemendur væru áhugasamir og ánægðir á stöðvunum í morgun eins og sjá má á þeim myndum sem teknar voru. Fullt af myndum voru teknar á mismunandi vinnustöðvum sem sjá má hér.

Skáknámskeið fyrir 1.-3. bekk og 3.- 6. bekk Í síðustu viku var haldið skáknámskeið fyrir 1. - 3. bekk. Óhætt er að segja að mikill áhugi væri námskeiðinu því samtals tóku yfir 50 nemendur þátt! Nemendur voru flestir mjög  duglegir og stóðu sig vel. Á laugardaginn fór fram meistaramót Síðuskóla fyrir þennan aldursflokk og tóku 16 nemendur þátt.  Leikar fóru þannig að jafnir í 2. - 3. sæti voru Viktor Már Árnason og Tryggvi Snær Hólmgeirsson en efstur varð Elvar Máni Ólafssonog fengu þeir allir viðurkenningarskjöl fyrir frammistöðuna. Leiðbeinendur á námskeiðinu voru Sigurður Arnarson,  Hersteinn Heiðarsson og Andri Freyr Björgvinsson. Nokkrar myndir frá námskeiðinu og frá mótinu má sjá hér. Rétt er að taka fram að Skákfélag Akureyrar er með æfingar fyrir áhugasama nemendur á mánudögum kl. 14.30 í vesturenda Íþróttahallarinnar á Akureyri (gengið inn frá Þórunnarstræti). Heimasíða félagsins er http://skakfelag.blog.is/blog/skakfelag/ og þar má nálgast allar nánari upplýsingar. Í þessari viku verður annað námskeið í skólanum. Það er ætlað nemendum í 3. – 6. bekk sem lært hafa mannganginn. Tímasetningar eru eftirfarandi Fimmtudagur 3. febrúar  kl. 14.30 til 16.00 Föstudagur 4. febrúar kl. 14.00 til 16.00 Laugardaginn 5. febrúar frá kl. 10.00 til 12.00 verður meistaramót Síðuskóla fyrir 3. – 6. bekk. Þeir nemendur sem eiga töfl eru hvattir til að taka þau með. Aðalleiðbeinandi á námskeiðinu verður Sigurður Arnarson, skákmeistari Skákfélags Akureyrar og er aðgangur ókeypis.

Í gær, fimmtudaginn 27. janúar, voru úrslit í 100 miða leiknum kunngerð á sal þar sem allir nemendur skólans voru saman komnir. Vinningshafar voru kallaðir á svið og fengu að vita að þeirra biði ísveisla að hætti skólastjórans í dag, föstudaginn 28. janúar.   Að því loknu var söngsalur fyrir allan skólann sem nemendaráð hafði undirbúið og stjórnað. Textum laganna sem sungin voru, var varpað á tjald. Þetta er í fyrsta skipti sem söngsalur er fyrir alla nemendur skólans og tókst hann vel í alla staði.   Þeir sem voru í vinningslínunni í 100 miða leiknum voru: Kristján Breki í 7. KJK, Mikael í 1. bekk, Aldís Anna í 9. bekk,   Auður Pálsdóttir í 10. KLM, Daníel Orri í 3. MB, Gunnar Ögri í 5. ÁEK,   Sóley Gunnarsdóttir í 2. bekk, Hugrún Bylgja í 3.MB, Jóna María í 5. SEB,   og Bjarni Fannar í 3. MB

Skáknámskeið Fyrirhugað er að halda námskeið í skák fyrir nemendur Síðuskóla. Aðal leiðbeinandi verður Sigurður Arnarson, skákmeistari Skákfélags Akureyrar. Námskeiðið verður tvískipt. Fyrri hlutinn verður fyrir nemendur í 1.-3. bekk en seinni hlutinn fyrir 3. – 6. bekk. Gott væri að nemendur tækju með sér töfl ef þeir eiga þau, en slíkt er ekki skilyrði. Tímasetningar eru eftirfarandi 1.- 3. bekkur Fimmtudaginn 27. jan. kl. 14.15-16.00  Föstudaginn 28. jan. kl. 13.15-15.15  Laugardaginn 29. jan. kl. 10.00-12.00 verður skákmót.  3.- 6. bekkur (framhaldsnámskeið) Fimmtudaginn 3. feb. kl. 14.30 -16.00  Föstudaginn 4. feb. kl. 14.00 -16.00  Laugardaginn 5. feb. kl 10.00-12.00 verður skákmót. Námskeiðin eru nemendum að kostnaðarlausu.

Foreldrar hafa eflaust orðið varir við það hjá börnum sínum að nú er í gangi leikur í skólanum sem nefnist 100 miða leikurinn. Þessi leikur gengur út á það að á hverjum degi í 10 daga fá einhverjir 10 nemendur sérstaka hrósmiða fyrir góða hegðun. Einhverjir tveir starfsmenn fá fimm miða hvor á degi hverjum, til að úthluta. Miðarnir eru settir á sérstaka töflu hjá ritara og nöfn nemendanna skráð í bók. Nemendur draga miða með númeri sem ræður því hvar miðinn þeirra lendir á töflunni. Þegar tíminn er liðinn verða tíu nemendur dregnir út af þessum 100 og fá þeir verðlaun hjá skólastjóra sem enginn veit um hver eru nema hann. Við erum á þriðja degi í dag, mánudaginn 17. janúar, og leikurinn skapar góða stemmingu hjá nemendum.