Fréttir

Í dag kom rithöfundurinn Ævar Þór Benediktsson í heimsókn og las upp úr bók sinni Þín eigin goðasaga. Mikill fjöldi nemenda hlýddi á eða 3. - 8. bekkur og áhuginn skein úr hverju andliti. Svona uppbrot er alltaf skemmtilegt og hvetur vonandi nemendur til dáða þegar kemur að lestri. Myndir frá upplestrinum.

Í vikunni stóð öryggisráð skólans fyrir rýmingaráætlun þar sem farið var út um neyðarútgang á C og D gangi. Nemendur vissu að þetta stæði til og fengu að vera inni á skóm og í yfirhöfnum. Þegar svo bjallan hringdi fóru allir út um gluggann og söfnuðust saman í röðum á fyrirfram ákveðnu svæði. Kennarar og starfsmenn aðstoðuðu og gripu með sér rauð/græn spjöld sem eiga að vera í öllum stofum. Þegar búið er að staðfesta að allir séu komnir út snúa þeir grænu hliðinni fram. Meðfylgjandi myndir tala sínu máli. í dag fengu nemendur í 3. bekk heimsókn frá slökkviliðinu. Þar fengu þeir fræðslu. Hér má sjá myndir frá 3. bekk.

Í dag héldum við SMT dag og viðfangsefnið að þessu sinni var vinátta og að sjálfsögðu fléttast þar ábyrgð og virðing saman við svo einkunnarorð skólans eru í fyrirrúmi, ÁBYRGÐ - VIRÐING - VINÁTTA. Vinabekkir hittust og spiluðu saman í tæpa klukkustund og eldri nemendur leiðbeindu þeim yngri. Þeir bekkir sem unnu saman í dag voru 1. og 6. bekkur, 2. og 7. bekkur, 3. og 10. bekkur, 4. og 9. bekkur og 5. og 10. bekkur. Eins og meðfylgjandi myndir sýna gekk dagurinn vel og nemendur nutu þessarar tilbreytingar og samveru.

Þriðjudaginn 17. nóvember flugu 16 nemendur Síðuskóla til Svíþjóðar. Þetta eru Freyr, Soffía, Eygló og Elísabet úr 9. bekk og Rakel, Hulda Björg, Viktor, Ómar, Hörður, Alma, Sævar, Björn, Bjarki, Linda og Brynja sem eru nemendur úr 10. bekk. Farastjórar eru Bibbi og Björk umsjónarkennarar úr 9. bekk og Sigga Bjarna umsjónarkennari í 7. bekk. Þessi ferð er styrkt af Comernius og er hluti af verkefni sem tengist forritun en það er ein valgreinanna sem boðið er upp á í skólanum. Ferðin út gekk vel og nemendur mættu í sænska skólann í gær eins og sjá má á meðfylgjandi mynd. Í vor munum við taka á móti sænskum nemendum sem dvelja munu viku á Íslandi og sækja nám í Síðuskóla. Hér má sjá nokkrar myndir úr ferðinni og fleiri myndir hér.

Þann 16. nóvember höldum við hátíðlegan dag íslenkrar tungu en það er fæðingardagur Jónasar Hallgrímssonar. Ýmislegt er gert í tilefni þessa dags. Stóra upplestrarkeppnin er sett í 7. bekk og nú tekur við tímabil æfinga í upplestri og framsögn hjá þeim. Litla upplestarkeppnin í 4. bekk er einnig sett þennan dag og vinna þeir nemendur einnig markvisst að þjálfun í lestri. Nemendur fóru í heimsókn á leikskóla og lásu fyrir börnin. Myndir frá af 4. og 7. bekk á sal þegar stóra upplestrarkeppnin og litla upplestrarkeppnin voru settar.  Á unglingastigi hefur sú hefð haldist í mörg ár að hver árgangur hittist í einum grunnskólanna. Þar er breytilegt milli ára hver áherslan er. Stundum eru fluttar ræður en stundum sýna nemendur leikþætti eða lesa upp og þá er ákveðið viðfangsefni hverju sinni. Í ár voru það íslensku þjóðsögurnar sem nemendur túlkuðu. Hér má sjá myndir af nemendum 9. bekkjar en þeir hittust hér í Síðuskóla.

Í dag var þemadagur í skólanum þar sem þema dagsins var læsi. Nemendum var blandað í hópa þvert á árganga þar sem nemendur úr hverjum árgangi voru í öllum hópum. Viðfangsefnin voru fjölbreytt og skemmtileg, t.d. gerð bókamerkja, tilvitnanir úr bókum voru skrifaðar upp og límdar á gólfin, unnið með veður læsi og spurningakeppni sem reyndi á merkjalestur svo dæmi séu nefnd. Nemendur voru til fyrirmyndar og þeir eldri fundu til sín þegar þeir gátu aðstoðað þá yngri. Hér má sjá myndir frá deginum.

Í morgun var söngsalur. Allir nemendur komu saman á sal og sungu lög sem 2. og 7. bekkur völdu. Systa spilaði undir nokkur lögin á gítar en með aðstoð tæknimannanna Snævars og Kristjáns var undirspil annarra laga af youtube. Í lok söngsals afhenti Ólöf Inga skólastjóri Huldu Margréti Sveinsdóttur, formanni nemendaráðs nýjan SMT fána þar sem sá gamli var orðinn veðraður og lúinn. Nemendur í nemendaráði fóru síðan út og tóku gamla fánann niður og flögguðu þeim nýja. Hér eru myndir frá söngsalnum og nemendaráði.

Nú er komið nýtt fréttabréf fyrir nóvember mánuð. Það má finna hér. Í þessu fréttabréfi er m.a. fjallað um læsi, verkefnið jól í skókassa og birtar myndir frá bleikum degi í október. Þá er matseðill mánaðarins á sínum stað.

Hér í Síðuskóla hefur skapast sú hefð að nemendur í 7. bekk taka þátt í verkefninu Jól í skókassa. Nemendur unnu  saman í hópum, byrjað var á því að pakka skókassa inn í jólapappír. Í kassann voru settar gjafir fyrir krakka á ákveðnum aldri og fyrir annað hvort stelpur eða stráka. Hóparnir komu með dót að heiman og keyptu það sem upp á vantaði. Pakkarnir verða síðan sendir til  Úkraínu til barna sem búa við slæm skilyrði.  Hér má sjá myndir af nemendum við að pakka og flokka gjafir.