ÍSAT

Lestrarkeppni 4. og 5. bekkja 2014 Nú er lestrarkeppninni milli 4. og 5. bekkja lokið en hún stóð yfir í tvær og hálfa viku eða frá 24. mars til 9. apríl. Alls lásu nemendur hvorki meira né minna en 35.443 blaðsíður eða að meðaltali 521 bls. á mann. Viðurkenningu fyrir mjög góðan árangur í 5. bekk fékk Halldór Birgir Eydal og viðurkenningu fyrir mikinn dugnað í 5. bekk fékk Jóhann Ingi Gunnarsson. Lestrarhestar og þeir sem sýndu mestar framfarir fá í verðlaun bókina Ferðahandbók fjölskyldunnar sem Mál og menning gefur út. Þetta er sérstaklega skemmtileg og fróðleg bók til að hafa með sér í ferðalagið og bendir manni á marga spennandi staði fyrir börn til að skoða og upplifa. Lestrarhestar í 4. bekk eru: B. Írena Sunna Björnsdóttir og Kristlaug Eva Wium Elíasdóttir. Mikla eljusemi og mjög góðan árangur í 4. bekk sýndu Ísafold Kelley og Telma Þorvaldsdóttir  Lestrarhestur í 5. bekk HL er Tryggvi Snær Hólmgrímsson og mestar framfarir sýndi Jóhann Sverrir Elfarsson.  Lestrarhestur í 5. bekk SEB er Sóley Gunnarsdóttir og mestar mestar framfarir sýndi Tinna Huld Sigurðardóttir. Og hvort var það svo 4. eða 5. bekkur sem vann þessa keppni???? Það var mjög mjótt á mununum en þegar öll atkvæði höfðu verið talin kom í ljós að........það var 4. bekkur, en þau lásu hvorki meira né minna en  19.163 blaðsíður samtals. Myndir af þessum lestrarsnillingum.

Það var mikið fjör þegar allir nemendur skólans tóku þátt í Ævintýraleik Nemendaráðs í dag. Þá fengu nemendur nöfn ævintýrapersóna og þurftu síðan að fara af stað og finna alla í þeirra ævintýri. Þetta er í fyrsta skipti sem leikurinn er prófaður og greinilega nokkur atriði sem þarf að slípa en í heildina gekk leikurinn mjög vel og gaman að fylgjast með samvinnu nemenda úr öllum deildum skólans. Myndirnar tala sínu máli.

Í framhaldi af ferð 4. bekkjar til Samherja í síðustu viku komu tveir feður í árganginum færandi hendi. Stofan fylltist af allskyns fiskitegundum sem voru skoðaðar í bak og fyrir. Okkur til aðstoðar var Elías, faðir í bekknum, sem sagði krökkunum frá sjómennskunni og veiðum. Nemendum í 1. – 3. bekk var einnig boðið í heimsókn að skoða og vakti það mikla hrifningu. Heimsóknin til Samherja og fiskiskoðunin í skólanum er framtak foreldra í bekknum og þökkum við þeim kærlega fyrir þessa frábæru samvinnu. Sjá myndir hér.

Undankeppni Skólahreysti fór fram í mars og fimm þættir um keppnina verða sýndir á föstudagskvöldum í Ríkissjónvarpinu í apríl. Síðuskóli mun verða einn af þeim tólf skólum sem sem keppa til úrslita í Laugardalshöll föstudaginn 16. maí í beinni útsendingu í Sjónvarpinu Landsbankinn er aðal styrktaraðili Skólahreysti og á heimasíðu hans má finna margar skemmtilegar myndir úr keppninni.

4. bekk í Síðuskóla var boðið í heimsókn í Samherja í síðustu viku. Þar fengu þau góða leiðsögn um vinnsluna sem Þorvaldur, Hákon og Sólveig sáu um. Þetta var mjög fræðandi og skemmtileg ferð og kunnum við Þorvaldi sem bauð okkur bestu þakkir fyrir.  Í framhaldi af þessari ferð fá krakkarnir svo að skoða og vinna með ýmsar fisktegundir í skólanum sem feður í bekknum færðu okkur.  Hér má sjá myndir frá heimsókninni, takk kærlega fyrir okkur.

Skemmtum okkur skíðum á skólinn allur saman. Fagurt reyndist fjallið þá fannst þar öllum gaman!    Myndir frá útivistardeginum.

Nú reynum við aftur að hafa útivistardag og hann er áætlaður föstuudaginn 28. mars 2014 ef veður leyfir. Veðurspáin er góð þannig að miklar líkur eru á að hann standi. Engin hefðbundin kennsla verður þennan dag. Mæting í skólann er kl. 8:00. Farið verður upp í Hlíðarfjall frá skólanum og fyrsta rúta leggur af stað ca. 8:20. Nemendur velja hvort þeir fara á skíði, bretti, gönguskíði, sleða, snjóþotu eða í göngutúr. Fyrir 4. – 10.  bekk er í boði að fá lánaðan búnað í fjallinu og höfum við íþróttakennarar mælt stærð og skráð óskir. Yngstu nemendurnir ( 1. – 3. bekkur ) mega koma með sinn búnað ef þeir eru vanir. Gönguskíðibúnaður er í boði fyrir alla nemendur. Þessi ferð er nemendum að kostnaðarlausu! Nemendur þurfa að koma með skriflegt leyfi að heiman ( í boði fyrir 6. – 10. bekk) ef þeir ætla að vera lengur en til 12:30 uppi í fjalli.     Skóladegi  lýkur kl.  13:15 og nemendur í frístund fara þangað. Nemendur sem eru skráðir í mat borða þegar þeir koma úr fjallinu. Munið eftir næringaríku og góðu nesti og að klæða sig vel. Hjálmskylda er þennan dag og engar undantekningar leyfðar. Hægt er að fá lánaða hjálma í fjallinu.   Foreldrar / forráðamenn eru beðnir að fylgjast með því á föstudagsmorguninn, ef veður er tvísýnt, hvort farið verður í fjallið áður en nemendur koma í skólann. Það mun birtast á heimasíðunni.