Fréttir

Fyrir stuttu var haldið blakmót fyrir nemendur í 7. – 9. bekk  grunnskólanna á Akureyri.   Úr Síðuskóla tóku tvö lið þátt með góðum árangri, eitt lið úr 7. bekk og eitt lið úr 9. bekk. Bæði liðin stóðu sig mjög vel. 7. bekkingar gerðu sér lítið fyrir og  unnu mótið í sínum aldursflokki. Þeir komu heim með bikar og að auki vegleg verðlaun, sem eru pizzaveisla fyrir bekkinn.      Við óskum krökkunum til hamingju með árangurinn á þessu blakmóti. Hér eru nokkrar myndir af sigurliðinu úr 7. bekk, sem kallar sig „The Sunshine Boys“.  Blakarar í þessu liði heita: Alexander Kristján Sigurðsson, Mads Lund Munkö, Róbert Andri Steingrímsson og Svanur Áki Ben Pálsson .

Afhent í vor í sjöunda sinn. Verðlaun þessi eru sannkölluð þjóðarverðlaun því hver og einn getur sent inn sínar tilnefningar. Við höfum flest skoðanir á því hvað sé góður kennari, frábært námsefni ellegar góður skóli.  Því viljum við hvetja alla til að senda inn tilnefningar um þá sem þeir telja að hafi gert góða hluti og eigi skilið að fá Íslensku menntaverðlaunin, og þannig vekja athygli á því sem vel er gert í íslenskum grunnskólum. Verðlaunaflokkar Íslensku menntaverðlaunanna: 1. Skólar sem sinnt hafa vel nýsköpun eða farsælu samhengi í fræðslustarfi.2. Kennarar sem skilað hafa merku ævistarfi eða á annan hátt hafa skarað framúr.3. Ungt fólk sem í upphafi kennsluferils hefur sýnt hæfileika og lagt alúð við starf sitt.4. Höfundar námsefnis sem stuðlað hafa að nýjungum í skólastarfi. Nánari upplýsingar á www.forseti.is. Tilnefningar skal senda hvort sem er til skrifstofu forseta Íslands, Staðastað, Sóleyjargötu 1, 150 Reykjavík, eða á netfangið mennta­verdlaun@forseti.is Síðasti skiladagur tilnefninga er þriðjudaginn 10. maí 2011. Vekjum athygli á því sem vel er gert

Krakkarnir í 7.bekk dvelja á Reykjum í Hrútafirði dagana 11.-15.apríl.  Allt gengur vel og skemmta sér allir konunglega. Nokkrar myndir fá að fylgja með sem sýna viðfangsefni barnanna seinnipart þriðjudagsins. 

Ert þú nemandi á unglingastigi í einhverjum af grunnskólum Akureyrarbæjar og langar að freista gæfunnar sem fréttamaður/kona? Grenndargral.is leitar að fréttamönnum til að flytja nýjustu tíðindi eða fréttir af hinu liðna úr heimabyggð. Óskað er eftir fréttum sem á einhvern hátt tengjast sögu og/eða menningu Eyjafjarðar. Fréttir fjölmiðlanna eru sjaldnast unnar af unglingum og því höfða þær gjarnan meira til eldra fólks. Unglinga þyrstir þó ekkert síður í fróðleik þó áhugi þeirra liggi stundum á öðrum sviðum en hinna sem eldri eru. Til að ná augum og eyrum unglinganna þarf einfaldlega að segja fréttir með þarfir og áhugsvið þeirra í huga. Hverjir eru betur til þess fallnir en unglingarnir sjálfir að afla frétta og segja frá þeim? Nú getur þú, nemandi góður, lagt þitt af mörkum svo að rödd ykkar heyrist. Allt sem þú þarft að gera er að finna spennandi viðfangsefni og búa til úr því frétt sem síðan verður birt á www.grenndargral.is (heimasíða Leitarinnar að grenndargralinu).Viltu gerast leikhúsgagnrýnandi, fjalla um skólalífið eða segja frá því þegar fyrstu bresku hermennirnir komu til Eyjafjarðar? Kannski höfðar rannsóknarblaðamennska til þín. Hvað hefur áunnist með sameiningu Þórs og KA í meistaraflokki karla í handbolta? Hvers vegna sameinast ekki knattspyrnudeildirnar? Þetta eru aðeins örfá dæmi um hvað þú getur fjallað um. Í hverjum mánuði verður valin áhugaverðasta fréttin og hljóta fréttamennirnir á bak við fréttina viðurkenningu auk veglegra verðlauna. Ert þú næsta vonarstjarna Íslands á vettvangi fjölmiðlanna? Kynntu þér málið á www.grenndargral.is.

Þriðjudaginn 5. apríl var útivistardagur Síðuskóla. Þar fóru allir nemendur, kennarar og annað starfsfólk skólans í Hlíðarfjall og skemmtu sér saman. Sumir renndu sér á skíðum á meðan aðrir sýndu listir sínar á snjóbrettum. Einhverjir brugðu síðan undir sig betri fætinum og gengu ásamt kennurum í Strýtuskála og borðuðu nestið sitt þar. Ekki var annað að sjá en allir skemmtu sér vel þennan dag í ágætu veðri og góðu færi í fjallinu. Einhverjir hlutu þó slæma byltu og óskum við þeim góðs bata og vonum að þeir nái fullri heilsu fljótt aftur. Á meðfylgjandi myndum sem Gulli smíðakennari tók má sjá hvar gleðin skín af hverju andliti.

Nemendur úr Síðuskóla standa sig vel á ýmsum sviðum. Það er gaman að segja frá Lilju Rún í 9. bekk sem hefur staðið sig mjög vel í sundinu. Lilja Rún hefur æft sund síðan hún var 9 ára. Í vetur hefur hún tekið þátt í landsliðs­verkefnum ÍF sem ungur og efnilegur sundmaður. Hún fer ásamt 3 öðrum suður 3-4 sinnum yfir veturinn til að fara í æfingabúðir með landsliðinu ásamt því að sitja fyrirlestra um ýmislegt uppbyggilegt. Þessu fylgir einnig að taka þátt í sem flestum sundkeppnum. Hún var stigahæsta sundkona fatlaðra á uppskeruhátið Óðins sem var haldin var í janúar s.l.Haustið 2010 keppti Lilja Rún á Íslandsmeistaramóti í 25 m laug og uppskar Íslands­meistara­titil, 1 gull, 2 silfur og 1 brons. Í janúar keppti hún á Reykjavík International Games og vann þar 2 silfur og 2 brons. Nýlega var keppni á Íslandsmeistaramóti í 50 m laug, þar nældi Lilja Rún í 1 gull, 2 silfur og 4 brons.Í ágúst á þessu ári fer Lilja Rún til Finnlands til að keppa á Norrænu barna og unglingamóti og óskum við henni góðs gengis þar og í áframhaldandi keppni í sundinu.

Á dögunum tók lið frá Síðuskóla þátt í Skólahreysti  og stóðu keppendur sig mjög vel og lentu í þriðja sæti. Þau sem tóku þátt voru Auður Kristín Pétursdóttir, Helena Rut Pétursdóttir og Einar Aron Fjalarsson sem öll eru í 9. bekk B og svo Daril Suson Balo sem er í 10. bekk.  Auður Kristín náði þeim frábæra árangri að ná öðrum besta tíma í hreystigreip sem náðst hefur í keppninni til þessa. Þetta eru frábærir krakkar og við hyggjum gott til næstu keppni þegar þrjú þeirra verða komin í 10. bekk. Hér eru nokkrar myndir sem Fjalar Fjölnisson tók.