Í dag var jólaföndurdagur hjá okkur í skólanum. Margt skemmilegt var föndrað og búið til, bæði jólakort og jólaskraut. Nemendur fengu svo heitt kakó í frímínútum. Hér má sjá myndir frá þessum skemmtilega degi.
Í dag varð Síðuskóli Réttindaskóli UNICEF við hátíðlega athöfn í íþróttasal skólans. Allir nemendur og starfsmenn voru saman komin á sal til að hlýða á dagskrána í tilefni dagsins. Söngur og ræður nemenda og gesta gerðu stundina í senn skemmtilega og fróðlega. Ólöf Inga skólastjóri setti athöfnina. Sigurbjörg í 9. bekk kynnti og stjórnaði dagskránni. Fyrst sungu allir saman skólasöng Síðuskóla, svo sungu 4. bekkingar lagið um vináttuna. Fulltrúar úr réttindaráði sögðu nokkur orð, en það voru Óliver Örn í 4. bekk, Hlynur Orri í 8. bekk og Þóra Dís í 5. bekk. Baráttusöngur barnanna var fluttur af 1. bekk. Því næst ávarpaði Kristín Jóhannesdóttir sviðstjóri fræðslu- og lýðheilsusviðs Akureyrar og óskaði Síðuskóla til hamingju með viðurkenninguna og nafnbótina. Að lokum var komið að stóru stundinni þegar Unnur Helga Ólafsdóttir, verkefnastjóri UNICEF, afhenti Síðuskóla, frístundinni ásamt Undirheimum, staðfestingu á því að þau eru Réttindaskóli UNICEF, ásamt fána sem var dregin að húni í lok athafnar. Allir nemendur fengu svo ís í eftirrétt til að gera daginn enn eftirminnilegri.
Hér eru myndir frá deginum og aðeins hvað Réttindaskóli UNICEF stendur fyrir:
Réttindaskóli UNICEF (e. Child Right Schools) er hugmyndafræði og hagnýtt verkefni fyrir skóla- og frístundastarf sem tekur mið af samningi Sameinuðu þjóðanna um réttindi barnsins, Barnasáttmálanum eins og hann er iðulega nefndur, og miðar að því að auka virðingu, vernd og framkvæmd mannréttinda.
Þegar skóli gerist Réttindaskóli ákveður hann að skuldbinda sig við að gera réttindi barna að raunveruleika eftir bestu getu. Skóli, frístundaheimili og félagsmiðstöð eru jafnir samstarfsaðilar í verkefninu og er það gert með það að markmiði að setja barnið sem einstakling í miðju verkefnisins. Vinna með Barnasáttmálann hefur bein áhrif á líf barna og er mikilvægt að sú vinna fljóti sem mest milli allra þeirra uppeldisstofnanna sem barnið sækir.
Réttindaráð leiðir innleiðingu Réttindaskóla- og frístundar og hittist að minnsta kosti tvisvar í mánuði. Meðlimir ráðsins eru umsjónarmenn í skóla, frístundaheimili og félagsmiðstöð, tvö börn úr hverjum árgangi og fulltrúi foreldra/forsjáraðila. Réttindaráð Síðuskóla hefur unnið að þessari nafnbót undanfarin tvö ár.
Til hamingju Síðuskóli, frístund Síðuskóla og félagsmiðstöðin Undirheima með nafnbótina.
Næstkomandi þriðjudag, 26. nóvember, ætlum við gera aðra tilraun til að taka á móti viðurkenningu sem Réttindaskóli UNICEF. Hátíðin verður kl. 10.10 í íþróttahúsinu og bjóðum við gesti hjartanlega velkomna að gleðjast með okkur á þessum tímamótum.
Í dag fór 5. bekkur í Skautahöllina en það var viðurkenning fyrir bestan árangur í Göngum í skólann. Hér má sjá nokkrar myndir frá ferðinni.
Á laugardaginn var, 16. nóvember, var dagur íslenkrar tungu en það er fæðingardagur Jónasar Hallgrímssonar sem fæddist árið 1807 á Hrauni í Öxnadal. Á þessum degi ár hvert minnum við okkur á mikilvægi þess að varðveita og efla tungumálið okkar.
Íslenskan er ekki bara samskiptatæki, hún er lykillinn að menningu okkar, sögu og sjálfsmynd. Skólastarf gegnir stóru hlutverki í því að tryggja að íslenskan lifi áfram, því hér lærum við ekki aðeins reglur og gildi tungumálsins, heldur einnig að nota hana skapandi og á fjölbreyttan hátt. Íslenskan er dýrmæt - hún endurspeglar hugsanir okkar og heiminn sem við búum í. Hún veitir okkur orðin til að lýsa tilfinningum, vonum og draumum. Með því að leggja rækt við tungumálið tryggjum vð að komandi kynslóðir eigi sömu tækifæri til að tjá sig á okkar fallega tungumáli.
Í dag var Litla upplestrarkeppnin í Síðuskóla sett fyrir 4. bekk og einnig upplestrarkeppni grunnskólanna á Akureyri, Upphátt, fyrir 7. bekk. Nú tekur við tímabil æfinga í upplestri og framsögn hjá þeim. Haldnar verða uppskeruhátíðir í lok febrúar ásamt því að velja fulltrúa Síðuskóla fyrir Upphátt sem taka síðan þátt í lokahátíð grunnskólanna á Akureyri í Hofi á vordögum.
Einnig er efnt til keppni um besta veggspjaldið fyrir Upphátt keppnina og taka allir nemendur 7. bekkjar þátt í því. Skilafrestur fyrir veggspjaldið er 10. janúar 2025.
Eins og kom fram í Fréttabréfi Síðuskóla stóð til að skólinn fengi viðurkenningu sem Réttindaskóli UNICEF á morgun, 15. nóvember. Vegna veðurspár frestast þessi viðburður fram í næstu viku. Við munum setja inn upplýsingar um nýja tímasetningu þegar þær liggja fyrir.
Það styttist í árshátíð Síðuskóla og hér kemur skipulag fyrir árshátíðina sem verður haldin fimmtudaginn 7. nóvember og föstudaginn 8. nóvember. Nemendur í 10. bekk verða í aðalhlutverki með árshátíðaratriði sitt sem er leikritið Mamma Mia sem sýnt er á öllum sýningum.
Annual celebration at Síðuskóli 2024
Our annual celebration will be held Thursday 7. November and Friday 8. November
Students in the tenth grade will be in a leading role, showing the play Mamma Mia.
Below is the itinerary for these days ahead.
Undanfarna daga hefur óhuggnaður smám hafið innreið sína í Síðuskóla eftir því sem Hrekkjavökudagurinn nálgaðist. Sjá mátti ýmsar kynjaverur á sveimi um skólann. Í morgun á söngsal toppuðu nemendur og starfsmenn sig með því að mæta í búningum og skemmtu sér vel á söngsal og fengu auk þess draugasögu beint í æð !
Sjá myndir hér
