Fréttir

Sú hefð hefur skapast í Síðuskóla að hafa flokkunarkeppni á milli árganga. Nýlega var haldin flokkunarkeppni á yngsta stigi, miðstigi og unglingastigi. Sigurvegarar voru 3. bekkur, 6. bekkur og 10. bekkur. Markmið með keppninni er að þjálfa flokkun og auka með því móti endurvinnsluhlutfall.

Í október og nóvember var lestrarátak í skólanum. Nemendur á yngsta stigi lásu alls 1392 bækur - glæsilegur árangur hjá þeim. Lestrarhátíð var haldin sl. föstudag fyrir eldri nemendur sem luku þriggja bóka áskorun. Við megum eiga von á fleiri lestrarhvetjandi verkefnum á nýju ári. Myndir frá viðburðinum má skoða með því að smella á fyrirsögnina.

Stóra upplestrarkeppnin í 7. bekk og Litla upplestrarkeppnin í 4. bekk voru settar á sal Síðuskóla þriðjudaginn 19. nóvember síðastliðinn. Hefð er fyrir því að formleg setning sé á degi íslenskrar tungu þann 16. nóvember en hann bar nú upp á laugardegi.

Árshátíð Síðuskóla verður haldinn fimmtudaginn 14. og föstudaginn 15. nóvember nk. Með því að smella á fyrirsögn fréttarinnar má nálgast hlekk til að sjá dagskrá árshátíðardaganna.

Í dag kom Ævar vísindamaður í heimsókn og las upp úr bók sinni Þinn eigin tölvuleikur. Nemendur úr 3. - 7. bekk hlustuðu á Ævar að þessu sinni og var ljóst að mikil spenna var fyrir heimsókninni. Svona heimsóknir lífga alltaf upp á starfið og hvetja nemendur til dáða í lestrinum.

Nemendur í 7. bekk tóku í sjöunda skipti þátt í verkefninu Jól í skókassa. Að þessu sinni fóru tæplega 20 kassar frá okkur. Nemendur pökkuðu inn tómum skókössum og söfnuðu dóti í þá handa börnum í Úkraníu. Í hverjum kassa þarf að vera tannbursti, tannkrem, sápa, þvottapoki, ritföng, fatnaður, dót og nammi.

Við fengum góðan gest í dag, en til okkar kom Árni Árnason sem var að gefa út sína fyrstu bók. Bókin heitir Friðbergur forseti og er ætluð 8-12 ára krökkum. Hann las úr bókinni fyrir nemendur í 4.-6. bekk og ræddi við krakkana um mikilvægi lesturs og efni bókarinnar.

Nemendum í 4. bekk var boðið í leikhús á sýninguna Galdragáttin og þjóðsagan sem gleymdist með norðlenska leikhópnum Umskiptingum. Leikstjóri sýningarinnar er Agnes Wild og tónlistin frá Vandræðaskáldunum. Krakkarnir voru mjög ánægðir með sýninguna sem var mikil upplifun og vakti ýmsar tilfinningar. Sýningin var falleg, fyndin, svolítið sorgleg og nokkuð ógnvekjandi á köflum, enda efniviðurinn úr þjóðsögum Jóns Árnasonar. Börnin stóðu sig með prýði og sýndu af sér góða hegðun. Þegar komið var í skólann eftir sýninguna var rætt um upplifunina og sýninguna sjálfa.