Fréttir

Á föstudaginn sl. fögnuðum við þeim áfanga að hafa náð 20.000 hrósmiðum. Haldin er hátíð þegar þessum fjölda hrósmiða er náð þar sem allir nemendur taka þátt. Í ár dönsuðu allir Zumba í íþróttahúsinu undir stjórn Þórunnar Sigurðardóttur og Kolbrúnar Sveinsdóttur, sem jafnframt er starfsmaður skólans. Gaman var að sjá hvað allir skemmtu sér vel í dansinum eins og sést á myndunum sem fylgja fréttinni, en þær má sjá hér. Einnig má sjá skemmtileg myndbönd af hátíðinni hér.

Síðuskóli er þátttakandi í Erasmus+ verkefni með 4 öðrum skólum í Evrópu. Verkefnið heitir Traces of Europe og snýst um það að þessir 5 skólar kynna hver fyrir öðrum kennsluaðferðir sem þeir nota og hafa nýst vel.  Pólland lagði inn í verkefnið aðferðina „lært í gegnum leik“ (Game based learning).  Við í Síðuskóla eigum að reyna að kokma þessum aðferðum áleiðis í aðra skóla og var það gert nú í byrjun janúar er farið var í Brekkuskóla og nokkrir námsleikir kynntir fyrir kennurum þar.  Vonandi ná einhverjir kennarar að nýta sér þessa leiki. Myndir frá heimsókninni í Brekkuskóla má sjá hér.

Starfsfólk Síðuskóla óskar nemendum, foreldrum og öðrum velunnurum skólans gleðilegra jóla og farsældar á nýju ári með þökk fyrir samstarfið á árinu sem er að líða. Nemendur mæta aftur í skólann fimmtudaginn 4. janúar samkvæmt stundaskrá.

Síðasti skóladagurinn í Síðuskóla fyrir jólafrí er 21. desember. Þá verða litlu jólin haldin frá klukkan 9:00-11:00. Dagskrá er með hefðbundnu sniði. Það mæta allir í sínar heimastofur klukkan 9:00. Það horfa allir á jólaleikrit 6. bekkjar á sal sem tekur um 20 mínútur en dvelja svo með umsjónarkennara í heimastofum. Þangað koma jólasveinar í heimsókn og færa nemendum mandarínur.  Um klukkan 10:00 verður farið inn í íþróttasal en þar munu allir nemendur skólans ganga saman kringum jólatré og syngja saman gömul og góð jólalög. Dagskrá lýkur klukkan 11:00 þennan morgun. Þá fara nemendur heim, nema þeir sem skráðir eru í Frístund þennan dag. Skóli hefst aftur að jólaleyfi loknu fimmtudaginn 4. janúar samkvæmt stundaskrá.

Leitinni að Grenndargralinu er lokið þetta skólaárið en það var nemandi í 9. bekk, Halldór Birgir Eydal sem fann Grenndargralið í ár. Að launum fær hann verðlaunapening og veglegan farandbikar sem geymdur verður í skólanum næsta árið eða þar til keppninni lýkur að ári. Þeir sem þátt tóku í leitinni og skiluðu svörum við öllum þrautunum fengu einnig afhent viðurkenningarskjal fyrir framúrskarandi þátttöku.  Myndir af sigurvegara leitarinnar og nemendum sem skiluðu sínu með sóma.

Miðvikudaginn 6. desember var sannkölluð jólastund í Síðuskóla. Dagurinn hófst á jólasöngsal en meðan nemendur gengu inn í salinn spilaði fjögurra manna blásarasveit jólalög. Þessa sveit er skipuð tveimur starfsmönnum skólans, þeim Gutta og Malla en auk þeirra komu Gísli og Þorkell og eiga þeir skilið miklar þakkir. Nemendur sungu síðan jólalög við undirspil Ívars Helgasonar.  Að söngsal loknum tók við jóladagskrá þar sem hvert stig, yngsta stig, miðstig og elsta stig vann saman. Ýmislegt skemmtilegt var í boði, s.s. alls kyns föndur og bakstur, spil og spjall. Í hádeginu var síðan sannkallaður jólamatur á boðstólnum, skinka og tilheyrandi meðlæti. Myndir söngsal Myndir jólaþema

Í dag, á fulldeldisdaginn 1. desember, ákváðum við í Síðuskóla að hafa sparifatadag. Það var gaman að sjá hve margir komu sparilega klæddir, í skólann, bæði nemendur og starfsfólk. Við fengum góða gesti í heimsókn úr blásarasveit sem spilaði nokkur jólalög fyrir nemendur á yngsta stigi. Aldrei að vita nema við fáum að heyra í þeim aftur síðar.  Unglingarnir okkar hafa verið á faraldsfæti í dag. Nemendum 10. bekkjar var boðið að taka þátt í Þjóðfundi í Háskólanum á Akureyri en þar voru jafnréttismál rædd og Íslandsklukkinni hringt 17 sinnum. Á sama tíma fór fram í Hofi Ungmennaþing UNISEF og þar átti Síðuskóli fulltrúa úr 8. 9. og 10. bekk. Myndir af yngsta stigi.

Við minnum á árshátíð skólans á fimmtudag og föstudag. Skipulag sýninga má sjá hér. Myndir verða settar inn en jafnt og þétt. 1. foreldrasýning 2. foreldrasýning  3. sýning, árshátíð miðstigs 4. sýning, árshátíð unglingastigs Ball unglingastigs 5. sýning, foreldrasýning Myndataka nemendur, 1, 2, 3, 4.