ÍSAT

Við í Síðuskóla höfum ákveðið að endurtaka leikinn með símalausu dagana. Þetta gekk ljómandi vel hjá okkur síðast og fannst flestum nemendum þetta góð tilbreyting. Frá og með morgundeginum 22. mars og fram að páskaleyfi sem hefst þann 1. apríl verða því símalausir dagar. Þessa daga eiga nemendur að mæta án síma í skólann en ef þeir þurfa af einhverjum ástæðum að taka hann með í skólann láta foreldrar umsjónarkennara vita svo hægt sé að setja hann í læsta geymslu meðan á skóla stendur. Ef nemendur fylgja ekki þessu fyrirkomulagi afhenda þeir starfsmanni símann sem geymir hann í læstri hirslu þar til skóla lýkur. Þessi hugmynd var rædd í skólaráði skólans og hún samþykkt þar. Það er von okkar að símalausir dagar fái sama góða hljómgrunninn eins og síðast og við njótum samveru og samskipta án símanna.

Í morgun var söngsalur hjá okkur í Síðuskóla. Það voru 1. og 6. bekkur völdu lögin og tóku nemendur vel undir við undirleik Hemma Ara. Umhverfisnefnd kynnti nýjan Samgöngusáttmála Síðuskóla en markmið með honum eru: 

• Minnka mengun með umhverfisvænum ferðamáta.

• Hjálpa nemendum og starfsfólki að heilsuefla sig með virkum ferðamáta.

• Minnka notkun bíla.

Hér má sjá myndir frá söngsal.

Eitt af þeim skemmtilegu verkefnum sem við vinnum að skólanum er samstarfið við leikskólana í hverfinu, Hulduheima Sel og Krógaból. Samstarfið hefur verið í nokkuð föstum skorðum undanfarin ár, en á samstarfsfundi í haust kviknaði sú hugmynd að hafa sameiginlega samverustund á sal Síðuskóla þar sem leikskólarnir kæmu og hittu 1. bekk. Sú stund var í morgun og var mjög vel heppnuð, 1. bekkur sýndi leikrit, nokkrir nemendur lásu úr frumsömdum bókum og í lokin sungu allir saman við undirleik Systu. Allir voru sammála um að endurtaka þetta fljótlega aftur. Hér má sjá myndir sem voru teknar í morgun. Takk fyrir komuna Hulduheimar Sel og Krógaból!