Fréttir

Nemendur í 7. bekk tóku í sjöunda skipti þátt í verkefninu Jól í skókassa. Að þessu sinni fóru tæplega 20 kassar frá okkur. Nemendur pökkuðu inn tómum skókössum og söfnuðu dóti í þá handa börnum í Úkraníu. Í hverjum kassa þarf að vera tannbursti, tannkrem, sápa, þvottapoki, ritföng, fatnaður, dót og nammi.

Við fengum góðan gest í dag, en til okkar kom Árni Árnason sem var að gefa út sína fyrstu bók. Bókin heitir Friðbergur forseti og er ætluð 8-12 ára krökkum. Hann las úr bókinni fyrir nemendur í 4.-6. bekk og ræddi við krakkana um mikilvægi lesturs og efni bókarinnar.

Nemendum í 4. bekk var boðið í leikhús á sýninguna Galdragáttin og þjóðsagan sem gleymdist með norðlenska leikhópnum Umskiptingum. Leikstjóri sýningarinnar er Agnes Wild og tónlistin frá Vandræðaskáldunum. Krakkarnir voru mjög ánægðir með sýninguna sem var mikil upplifun og vakti ýmsar tilfinningar. Sýningin var falleg, fyndin, svolítið sorgleg og nokkuð ógnvekjandi á köflum, enda efniviðurinn úr þjóðsögum Jóns Árnasonar. Börnin stóðu sig með prýði og sýndu af sér góða hegðun. Þegar komið var í skólann eftir sýninguna var rætt um upplifunina og sýninguna sjálfa.

Nú er átakinu Göngum í skólann lokið og tóku 73 skólar þátt í því í ár. Mjög fjölbreytt og skemmtilegt starf var unnið í grunnskólum landsins í tilefni af átakinu. Við í Síðuskóla hófum átakið með göngu upp að Hraunsvatni. Auk þess skráðu íþróttakennarar hlutfall nemenda sem notuðu virkan ferðamáta til að koma í skólann í þær fjórar vikur sem átakið stóð yfir. Virkir ferðamátar eru t.d. að ganga, hjóla eða að nota strætó.

Í maí sl. settu núverandi 2. bekkingar niður kartöflur í einum af innigörðum skólans. Í morgun voru svo nemendur að taka upp og skoða uppskeruna. Með því að smella á myndina með fréttinni má sjá áhugasama nemendur í þessu skemmtilega verkefni.

Í tilefni af Degi íslenskrar náttúru þann 16. september fóru nemendur Síðuskóla í vettvangsferðir og fræddust um náttúruna. Einnig fór fram keppnin Náttúrufræðingur Síðuskóla en þar eiga nemendur að greina myndir af fuglum, plöntum og landslagi.

Í gær fóru nemendur og starfsfólk skólans í gönguferð að Hraunsvatni. Farið var með rútum frá skólanum að Hálsi og þaðan var gengið upp að vatninu. Frekar kalt var í veðri og rigning á köflum, hópurinn lét það ekki á sig fá og við vorum mjög stolt af hópnum. Óhætt að segja að svona dagar eigi stóran þátt í að efla seiglu. Hér má sjá myndir úr ferðinni.

Síðasta þriðjudag fengum við góða heimsókn en það var leikrit á vegum verkefnisins List fyrir alla. Í ár var boðið upp á söngleik fyrir 1. – 3. bekk sem heitir Björt í sumarhúsi, en sýningin er eftir Elínu Gunnlaugsdóttur og textarnir eftir Þórarin Eldjárn. Valgerður Guðnadóttir sá um söng og leik en Hrönn Þráinsdóttir lék undir á píanó.

Mikið hefur verið að gera hjá okkur í skólanum undanfarna daga. Á föstudaginn héldum við uppá 35 ára afmæli Síðuskóla með alls konar uppbroti á starfinu og í lok dags voru grillaðar pylsur og afmæliskaka á boðstólnum. Með því að smella á fyrirsögn fréttarinnar má sjá myndir.